यापूर्वी या प्रकारच्या प्रसूतींसाठी उशिरा होणारे विवाह, वाढत्या वयातील बाळंतपण ही प्रमुख कारणे होती. वाढते ताणतणाव, आईला होणारा जंतूसंर्सग, अन्य आजारांवरील औषधांचे दुष्परिणाम, अनुवांशिकता, कमी व अतिरिक्त वजन ही मुदतपूर्व प्रसूतीची मुख्य कारणे असल्याचे स्पष्ट झाले आहे.
मुंबईतील पालिका रुग्णालयांमध्ये हा दर २१ टक्के इतका आहे. तर वाडिया प्रसूती रुग्णालयामध्ये मागील दोन वर्षांत मुदतपूर्व प्रसूतीचे प्रमाण २१ ते २२ टक्के आहे. मात्र या रुग्णालयांत स्वतःहून नोंदणी करून प्रसूतीला आलेल्या गर्भवतींसह गुंतागुंतीच्याही प्रसूतीही केल्या जातात, असे वाडिया रुग्णालयातील मुख्य कार्यकारी अधिकारी मिनी बोधनवाला यांनी स्पष्ट केले. कष्टकरी वर्गातील महिला कुपोषित आणि अनेमियाग्रस्त असतात, त्यामुळे जन्माला येणाऱ्या बाळालाही पुरेसे पोषण म‌ळित नाही. केईएम रुग्णालयामध्ये मुदतपूर्व प्रसूतीचा दर २० ते २२ टक्के असल्याचे केईएम रुग्णालयाच्या निओनॅटोलाजी विभागप्रमुख डॉ. रुचा नानावटी सांगतात.
उच्चरक्तदाब आणि मधुमेह या दोन प्रमुख कारणांसोबत अनेक स्त्रियांना गर्भारपणामध्ये कावीळ होण्याचे प्रमाण वाढले आहे. त्याचे योग्यवेळी निदान न झाल्यामुळेही प्रसूती लवकर होते. या प्रकारच्या प्रसूतीमध्ये पूर्वी बाळाच्या आयुष्याची खात्री कमी होती. मात्र आता वैद्यकीय प्रयत्नांमुळे हा दर सुधारल्याचे नायर रुग्णालयाच्या निओनॅटल विभागाच्या प्रमुख डॉ. सुष्मा मलिक यांनी ‘मटा’ला सांगितले. बाळ २८ किंवा ३६ आठवड्यांचे असले तरीही बाळाचे वजन, प्रतिकारशक्ती आणि संबधित आरोग्यकेंद्रामध्ये उपलब्ध असणाऱ्या सक्षम आरोग्य सुविधांमुळे बाळाला निरोगी आयुष्याची भेट देता येणे शक्य होते, अशीही माहिती त्यांनी दिली. थायरॉइड, कावीळ, एप‌लिेस्पीसारख्या आईला असलेल्या आजारांमुळेही मुदतपूर्व प्रसूतीची शक्यता वाढते.
